Дизакон 2020 тэмцээнд амжилттай оролцлоо

Япон улсын нийт Коосэн сургууль хоорондын "Дизакон-2020" тэмцээн 12 сарын 5, 6-ны өдрүүдэд анх удаа онлайнаар зохиогдлоо. 

Дизакон тэмцээний тухай товч түүх:

Загвар, бүтээцийн өрсөлдөөн буюу Design Competition тэмцээн нь анх 1971 онд Акаши коосэн болон Ёнаго коосэн хооронд өрнөснөөр эхэлсэн бөгөөд 2004 оноос эхлэн Японы нийт коосэн сургууль хооронд зохиогддог уламжлалтай болсон билээ. Тус тэмцээн нь жил бүр байршлаа солин /сумотой ижил/ зохион байгуулагддаг ба энэ жил Мияаги мужийн Натори хотод онлайнаар амжилттай зохиогдлоо. Дизакон тэмцээний хамгийн гол зорилго нь "Хүмүүсийн амьдрах орчинг бүрдүүлэх цогц технологийг хөгжүүлэх, үүгээр дамжуулан коосэнгийн оюутны мэдлэг чадварыг хөгжүүлэх" явдал юм. 

Дизакон тэмцээнээс гадна Коосэнгуудын дунд Робот контест /РОБОКОН/, Програм контест /Прокон/, Хиймэл оюуны контент /ДиКон/ зэрэг тэмцээнүүд зохион байгуулагдаж ирээдүйн шилдэг мэргэжилтэн инженерүүдийг оюутан байхаас нь илрүүлэн хөгжүүлдэг билээ.

Энэ жилийн Дизакон тэмцээнд нийт 35 коосэн сургууль оролцсон бөгөөд Монгол улсаас 3 коосэн сургууль шуудангаар бүтээлээ урьдчилан илгээж оролцсон юм. Манай сургууль эхний өдрийн шалгаруулалтад хийц, хэмжээсийн үнэлгээгээр 4-р байрт жагссан бол сүүлийн өдөр цаасаар хийсэн гүүр маань 30 кг-ийн ачааг тэсвэрлэж нийлбэр дүнгээр нийт багаас 12-р байрт шалгарлаа.

Багийн ахлагч барилга дэд бүтцийн инженерийн 4-р курсын оюутан А.Хүслэн нь өөрийн ярилцлагадаа "Энэ жилийн тэмцээн маш их туршлага боллоо, дараа жил амжилтаа заавал ахиулна" гэдгээ дурдаж байсан юм.

Нийт оролцсон баг, тамирчдадаа дахин баяр хүргэе.

#Dezacon2020 #NewMongolKosen #ShineMongol